Natamani tuishi wawili

Na Charles N Matagi

Tunafanya kama utani, ukweli unapenya ndani

Hicho chako kisirani, nakipoza na matani

Njoo wangu uwe wa ndani, tuyazungumze kitandani

Nakupenda si utani, punguza tafarani

Nikuite jina gani, maana yote yapo ghalani

Mpenzi au mwandani, yote yapo moyoni

Penzi langu la sirini, leo naliweka hadharani

Nakupenda si utani, tafadhali niweke moyoni

Uzuri wako wa asili, tabasamu lako sawili

Nakupenda nakiri, kwa wengine nimeghaili

Natamani tuishi wawili, tusiwasikilize waswahili

Watatuletea timbwili, moyo wako wataukatili

Jicho, pua, midomo, nyusi, nyuma umejaza kiasi

Una utamu wa nanasi, nimesahau mafenesi

Naitaji Zaidi nafasi, nikutoe wasiwasi

Achana na hao wazushi, nakupenda kupita kiasi