SIMULIZI FUPI: GRACE WA MWANZA

PICHA MTANDAONI

♥

Sura yake iliyokuwa imepauka, nywele zake ndefu zilizokosa

matunzo na midomo iliyokauka sana haikuweza kuificha

historia ya sura yake jinsi ilivyokuwa ikivutia miaka minne

nyuma.

♥

Alikuwa amejikunyata mitaa ya Kariakoo, mbele yake pakiwa

na sufuria dogo. Ndani yake pakiwa na matawi ya mchicha,

yakiwa yamejinyaukia katika namna ya kutia kinyaa. Bila

shaka hata yeye hakupendezwa kuyatazama majani yale.

Haikuwa mara ya kwanza kumuona binti Yule akiwa eneo

lilelile na katika hali ileile ya majonzi.

Ama kwa hakika alikuwa anasikitisha!

Sijui ni kitu gani kiliniaminisha kuwa anaweza kuzungumza

nami walau kwa dakika tano. Kwa sababu niliamini kuwa

hanitambui tena!!

Nikamkaribia na kuulizia bei ya matawi yale ya mchicha.

Alibabaika katika kunijibu na kisha akanitajia bei ambayo

niliamini hata yeye alitamka ilimradi aipate ile pesa.

♥

Nikatoa kiasi cha pesa aliyoihitaji lakini sikuishia kumpatia tu.

Badala yake nilimvuta kando na kisha nikauvunja ukimya.

Nikamweleza kuwa haikuwa mara ya kwanza kuonana naye,

na kidogo ningependa kuzungumza naye.   #djkibara

Akanitazama kabla ya kutoa tabasamu hafifu sana.

Sikuendelea kumtazama machoni badala yake niliinama na

hapo nikaiona miguu yake ilivyopauka na pia akiwa amevalia

kandambili zenye rangi tofauti.

♥

“Ni kipi unahitaji kujua kutoka kwangu ewe mwanaume!”

aliniuliza huku akipepesa macho huku na kule.

Kabla sijasema lolote akajitambulisha kwa jina lake.

“Naitwa Grace wa mwanza… sijui iwapo unalo jingine”

akataka kuondoka nikamdaka mkono, huku nikimkumbushga

kuwa kuwa bado sijampatia pesa yake.

Akanyoosha mkono ili nimpatie pesa lakini badala ya kumpa

pesa nikamwita kwa jina ambalo kamwe hakulitegemea.

“Mwamvita! Nini kilikusibu” nikamuuliza.

Macho yalimtoka, akanitazama mara mbilimbili asipate

kunikumbuka. Nilipoligundua hilo nikajitambulisha jina langu.

Akanisogelea na kisha kunikumbatia kwa nguvu sana, na

hapo nikahisi majimaji ya joto yakipenya katika mwili wangu.

Bila shaka alikuwa analia!

Sikutaka umati utushangae, nikamsogeza Yule binti kando,

tukaufikia mgahawa Fulani usiokuwa na watu wengi. Akaketi

mkabala na kiti nilichokuwa nimekaa mimi.

Hata kabla sijaanza kuzungumza lolote. Huku akiwa

anatokwa machozi Grace wa Mwanza akaanza kunielezea

jambo ambalo lilimfanya awe vile ninavyomuona wakati huu.

“Jimmy, naujutia usichana. Usichana ambao kamwe

hautarejea kamwe, najutia kiburi changu na huu ule urembo

ulionizuzua. Najutia hata marafiki niliowachagua, walikuwa

marafiki wabaya sana. Walinitafutia wanaume na nilitumika

mimi lakini pesa tulitumia pamoja nao. Ama!! Nilikuwa

bwege.

Wakanieleza kuwa mimi ni mrembo na sina hadhi ya kuishi

mjini Mwanza, maneno yao yale ya kipuuzi yakaniingia

kichwani. Hatimaye wakaniunganisha na mwanaume ambaye

aliniahidi kuwa ananileta jijini Dar es salaam kwa madhumuni

mawili. Kunitafutia kazi na kisha kunioa kabisa niwe mkewe

wa ndoa.

Jimmy, mama yangu alinikanya huku analia. Alinisihi sana

nisiondoke Mwanza. Nikamuigizia kuwa nimemuelewa

akapata amani ya moyo, lakini haikuwa vile. Nikaondoka

Mwanza huku nikijisemea kuwa kama yeye mama aliolewa na

baba yangu basi name ni haki yangu kuolewa.

Jimmy, haikuwa ndoa wala haikuwa kazi. Ama kwa hakika Dar

es salaam sio tu ni mkoa wa kipekee bali ni nchi ndani ya nchi

ya Tanzania.

Nchi hii inaweza kukufanya uwe mwehu ghafla na usipate

hata mtu mmoja wa kukushangaa.

Jimmy! Yule kaka aliyejifanya mume mtarajiwa alinitelekeza

kama utani vile baada ya kumgomea aliniponitaka nijiunge

katika danguro na kuuza mwili wangu.

Kutelekezwa huko ukawa mwanzo wa kujiuza bila hiari,

nimetumika Jimmy. Nimetumika sana. Hii ni laana Jimmy.

Laana kutoka kwa mama ambaye nilisikia kuwa aliugua sana

na sikurejea kumuuguza mama yangu.

Nimeteseka hadi hatua hii unionayo, sina thamani hata ya

kukaa ndani ya hoteli hii. Mimi ni mchafu, na sijui kama

sijaathirika. Nahisi mimi si mzima.

Hilo halinishtui lakini Jimmy huenda ni Mungu amekuleta

ukutane nami leo, nakusihi Jimmy. Nichukue Jimmy, najua

haiwezi kuwa kimapenzi kama ulivyohitaji wakati ule lakini

nichukue kama mwanadamu tu anayejutia kila jambo

alilolifanya.

♥

Nichukue unirejeshe nyumbani…. Nimeteseka Jimmy

imetosha!!

Nirejeshe Mwanza Jimmy, nikateseke na kufia huko. Naomba

usiniache Jimmy. Wananibaka kila siku…. Wananitukana kila

kukicha… sina amani hata chembe… sitaki kufia katika nchi

hii iliyo ndani ya nchi. Nchi isiyotambua nini maana ya utu,

nchi inayothamini pesa kuliko kitu chochote, nchi ambayo

ukabila hakuna lakini undugu pia haujulikani.

Nitoe katika nchi hii Jimmy.. nirejeshe nyumbani”

Alishindwa kuendelea kuzungumza Grace wa Mwanza.

Akanifuata nilipokuwa, akapiga magoti na kuendelea kusihi.

Nilijikaza nisitokwe na tone la chozi lakini haikuwezekana,

nikatokwa machozi. Nikamyanyua na kuabiri bajaji

ikatupeleka hoteli niliyokuwa nimefikia.

♥

Nikapanga safari ya upesi upesi.

Siku iliyofuata tukaondoka na Grace wa Mwanza… njia nzima

alikuwa amechangamka sana. Alikuwa anazungumza sana

huku mara kwa mara akijiuliza ni kwa namna gani ataulilia

msamaha kutoka kwa mama yake.

Baadaye alisinzia! Na huo nd’o wakati ambao niliutumia

kutafakari. Niliumia sana kwa sababu Grace hakuwa anaujua

ukweli.

Hakujua kuwa yule mama aliyesikia kuwa aliugua basi aliaga

dunia kwa ugonjwa uleule.

Nilihofia kumweleza maana ningeikatili furaha yake. Na

huenda lingeweza kuzuka tatizo jingine.

Tulifika Mwanza usiku sana, nikachukua vyumba viwili.

Tukapumzika na asubuhi nikamwongoza Grace hadi pale

palipoitwa nyumbani kwao.

Hapakuwa na nyumba bali gofu. Mimi sikuwa jasiri wa

kumueleza nini kilichotokea. Bali majirani tuliowakuta pale

ndio waliomuweka chini na kuzungumza naye.

♥

Naam! Siku nne baadaye mwili wako ulikutwa ukiwa

unaning’inia porini. Watu waliofika wa kwanza eno la tukio

walibahatika kuuona ujumbe uliouacha.

“Sina mama, sina baba, sina rafiki wa dhati bali nina rafiki

mmoja tu mbaya…nina UKIMWI… Siwezi kuishi na rafiki huyu

mbaya.

Wanizike watu wema!!

♥

JIFUNZE: Wazazi ni nguzo muhimu. Tafadhali wasikilize,

waelewe wasemacho. Wana kitu cha ziada ambacho, hata

ufanye vipi hauwezi kuwa nacho.

♥

MWISHO